FØREORD
Forfattar: Alf Strand

Både i vår nære og meir fjerne fortid er det hendingar og personar som lesarane kan ha glede av å verta nærare kjende med. Mykje lever på folkemunne utan å vera nedskrive, og dei som veit noko om det, vert eldre for kvart år. 

M.a. på grunn av redaktørskiftet kom redaksjonen noko seint i gang med arbeidet sitt. Likevel synest me at heftet har litt av kvart å by på. Også denne gongen har me med litt frå krigens dagar. Og i åra framover håper me å få sett på papiret noko av det som enno ikkje er skrive frå dei åra. 

Elles handlar det mykje om veg denne gongen. Om den fyrste vegbygginga i Masfjorden, om då vegen kom til Haugsdalen og om då Haugsdalsvegen vart nedlagd som riksveg. 

Me har mange jubilantar mellom oss. Sandnes kyrkja var 150 år i fjor, og i år har Matre Havbruksstasjon feira 25 års-jubileum, og Nordbygda samfunnshus er 10 år. Alt dette kan du finna stoff om i heftet. 

Redaksjonen vil alt no vera på bana og fortelja om kva me vil ha med i neste hefte, slik at dei som har stoff av interesse, kan ta til å tenkja på kva dei kan bidra med, fyrst som sist. Eit av emna me har tenkt å ta føre oss i neste nummer, er idrett og musikk, skulekorps og idrettslaga fyrst og fremst. Der skulle vel vera bra med stoff å ausa av. 

Drifta av dette heftet har gått i balanse frå år til år. Heretter vil det bli lettare å driva lokalhistorisk arbeid i Masfjorden, økonomisk sett. I haust fekk me ei stor og raus gåve frå ho som var med og starta dette sogeheftet i 1991, Ragnhild Jung. 100000 kroner har ho gjeve til det lokalhistoriske arbeidet i Masfjorden. Ein stor inspirasjon for oss som er med i dette arbeidet. Det er vanskeleg å finna dei rette orda når du mottek ei slik overveldande gåve. 

Me er Ragnhild Jung stor og audmjuk takk skuldig! 

Sandnes, november 1996 
Alf Strand
 
---------------------------------------------------------------------- 
Fjon frå fjell til fjord nr. 6 1996 -  Masfjorden Sogelag