Foto: Scandion.

Steinen er henta frå eit gatesteinbrot på Stamnes, som vart starta av Bergen kommune i 1871. Steinbrotet danna grunnlaget for den ærverdige fraktefarten som vaks fram på Osterfjorden og bautaen er eit minne både over dei som hadde arbeidet på sjøen, og dei som strevde i steinbrota eller sleit i leir- og sandgruvene. 

Sandfarten var ei næring som tok til kring 1870 i Stamnes og Straume, og som tok seg opp utover etter 1910. Næringa vart ei av dei største og viktigaste for desse bygdene i moderne tid og skapte grunnlag for auka busetnad langs fjordane. På Straume har det vore teke ut sand i fleire terasse-ringar som viser att i landskapet, jamvel om sandtaka no er attgrodde. 

Sandtak i naturlege terassar med avsetningar av sand og singel har gjeve grunnlag for ei god attåtnæring dei siste hundre åra. 

Sand til husbygging og vegar vart ført i flatbotna "Ostraskuter", seinare i sandskøyter, og frakta til distrikta ikring, særleg til Bergen. Nordvest for Straume bru vart det skipa ut mykje sand på store lastetippar, som tippa sand ombord i fartøya. Det første sandtaket var på Demring, der sanden vart lasta med trillebår ombord i sandskuter. 

Båtane kunne lasta opp til 8 famnar ved, og vedfarten var ein viktig varetransport. Tradisjonen fortel om bønder som gjekk i fast fart med ved til bakarane i Bergen.