I 60 år gjekk jobben som fyrvoktar på Lille Presteskjær i arv frå far til son gjennom tre generasjonar. Fyrvoktaren heitte då Gjertsen, og fyrfamilien levde sitt liv i tårnet. Reserveassistenten budde i øverste etasje, og så var det soverom i to etasjer ned. Stova var under der igjen, og i første etasjen var kjøkkenet. Eit besøk på Lille Presteskjær gir eit godt inntrykk av korleis livet i eit fyrtårn har vore. 

I over 28 år stod fyret tomt, inntil familien Midtbø fekk i stand ein leigekontrakt av staten og begynte oppussingsarbeidet. Lille Presteskjær manglar i dag den karakteristiske toppen. Då fyret blei automatisert blei lyktehuset kasta på sjøen, men sjølve fyrlykta blei plassert på Sjøfartsmuseet. Familien Midtbø jobbar med å få lyktehuset på plass for at fyret skal få tilbake sin opprinnelege utsjånad. Fyret tok i mot sine første gjestar i 2004 og ønsker stadig fleire turistar velkomen. 

Lille Presteskjær fyr kan besøkast på opne dagar i løpet av sommaren. Du kan også leige fyret for å bu eller arrangere private selskap.

Fyret er ikkje freda.

Kjelde: www.fyr.no