Vann 2. divisjon for 11. gang
Tekst og foto: Liv Brekken
Publiseringsdato: 26.03.2007

Brekke skulemusikkorps var i helga til Nordfjordeid og konkurrerte i Sogn og Fjordane Meisterskapen 2007 og henta heim sigeren for 11. gang. Det var 3 korps som deltok i 2. divisjon: Solund, Lavik og Brekke. 

Brekke skulemusikkorps trekte det lengste strået også dette året, med 91 poeng, 2 poeng framfor Solund og med Lavik ytterlegare 2 poeng bak. Dette var 11. gangen Brekke vann 2. divisjon brass i fylkesmeisterskapen. 

 
Byrknes følgde opp den gode trenden dei har hatt dei siste åra, og vann like godt 3. divisjon brass. Ytre Sogn har med andre ord nokre av dei beste skulekorpsa i fylket! 

Det var samling ved skulen der flagget gjekk til topps og idrettslaget spanderte pølser og brød og saft til alle. 

Varaordførar, Hallvard Oppedal ynskte alle til lukke med sigeren og gav mange lovord til korpset og dirigenten. 

I år har Brekke Skulemusikkorps meldt seg på til NM for skulekorps i Stavanger 23. og 24. juni. Dette vert første gangen korpset deltek i NM. Med andre ord ei ny og spennande erfaring!