Kystkommunen Gulen ligg heilt sørvest i Sogn og Fjordane, på grensa til Hordaland og mellom Sognefjorden og Fensfjorden. 
Landarialet på 596 kvkm inneheld ein variert og spennande natur, med 1500 øyar, holmar og skjer, og eit fastland som er prega av små dalføre som går på kryss og tvers i landskapet. 

Spennet er langt frå dei ytste nakne øyane mot Nordsjøen i vest, til dei frodige landbruksbygdene mellom dei ville fjella aust, mot stølsheimen. 

Dei 2500 fastbuande bur spreidd i landskapet, og fordeler seg ganske jamt i dei fire skulekrinsane Brekke, Dalsøyra, Eivindvik og Byrknes. Kyrkjene i Gulen ligg i Brekke, i Eivindvik og på Mjømna.