Nettsentralen har vore på tur til Sognefjorden, men ikkje for å sjå fagre fjell og fruktbløming. Grunnen er at straumnettet i Nordhordland, Gulen og Høyanger sør no skal styrast frå sentralen på Kokstad. 

- Nede ved fjorden her ser de linjebrytar nummer 7792. Når straumen går, er det særleg sjukeheimen og smoltanlegget som brukar å ringja, fortel guide Gjert-Rune Daae. Reisefølgjet i minibussen strekkjer hals og noterer ivrig på kartet. 

- Han som har stukke denne linja må nedstamma frå ei fjellgeit, kjem det tørt frå bakarste rad. Høgspentleidningen frå 1950-talet har ikkje akkurat funne den lettaste vegen der han slyngjer seg langs sørsida av Sognefjorden. 

Mil etter mil 
Denne våren har alle dei 19 tilsette ved Nettsentralen fått høve til å gjera seg betre kjende i Gulen, Masfjorden og Høyanger sør. I alt har dei arrangert fire turar. 
- Det viktigaste er å få eit bilete av dei ulike stadene og sjå kor leidningane går. Det hjelper oss å handla raskare ved feil, meiner senioringeniør Kari Merete Nilsen. Den største aha-opplevinga er nok avstandane. Ein centimeter på det skjematiske leidningskartet kan vera over ei mil i terrenget. 

Treng lokalkunnskap 
Etter ein kort innkøyringsperiode vert no nettet heilt nord til Sognefjorden styrt frå Kokstad. Driftssentralen i Knarvik er avvikla, og medarbeidarane der har fått nye oppgåver. Seksjonssjef på Nettsentralen, Martin Soltveit, synest samarbeidet under omlegginga har vore godt. 

- Det tar tid å byggja opp kompetanse om det nye området,og slike turar gjev høve til ei viktig kunnskapsoverføring. Vi vil også i framtida støtta oss på dei lokalkjende montørane, påpeikar han. 

Distribusjonsnettet i Nordhordland, Gulen og Høyanger sør har ca. 1200 kilometer høgspenningsnett. Omlegginga til styring frå Kokstad har kosta omlag 2 millionar kroner, som vil vera spart inn i løpet av fire år.